رباعيات صلاح جاهين..~

الشاعر الكبير صلاح جاهين
الرباعية الآولى & الثآنية
• اسمه الحقيقي محمد صلاح الدين بهجت أحمد حلمي

• ولد في 25 ديسمبر 1930 فى شارع جميل باشا بحي شبرا.

• والده المستشار بهجت حلمي الذي تدرج في السلك القضائي بدءًا من وكيل نيابة حتى عُين رئيساً لمحكمة استئناف المنصورة.

رباعيات صلاح جاهين ( 1 )

أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام
عجبي !!!!

سهير ليالي و ياما لفيت و طفت
و ف ليلة راجع في الضلام قمت شفت
الخوف ... كأنه كلب سد الطريق
و كنت عاوز أقتله .. بس خفت
عجبي !!

عجبتني كلمة من كلام الورق
النور شرق من بين حروفها و برق
حبيت أشيلها ف قلبي .. قالت حرام
ده أنا كل قلب دخلت فيه اتحرق
عجبي !!!

ورا كل شباك ألف عين مفتوحين
و انا وانتي ماشيين يا غرامي الحزين
لو التصقنا نموت بضربة حجر
و لو افترقنا نموت متحسرين
عجبي !!!

رباعيات صلاح جاهين ( 2 )

خرج ابن آدم من العدم قلت : ياه

[b]رجع ابن آدم للعدم قلت : ياه

تراب بيحيا ... وحي بيصير تراب

الأصل هو الموت ولا الحياه ؟

عجبي !!!

ضريح رخام فيه السعيد اندفن

و حفره فيها الشريد من غير كفن

مريت عليهم .. قلت يا للعجب

لاتنين ريحتهم لها نفس العفن

عجبي !!!

ياما صادفت صحاب و ما صاحبتهمش

و كاسات خمور و شراب و ما شربتهمش

أندم علي الفرص اللي أنا سبتهم

و الا علي الفرص اللي ما سبتهمش

عجبي !!

و الكون ده كيف موجود من غير حدود

و فيه عقارب ليه و تعابين ودود ؟؟

عالم مجرب فات و قال سلامات

ده ياما فيه سؤالات من غير ردود

عجبي !!!

يا باب يا مقفول ... إمتي الدخول

صبرت ياما و اللي يصبر ينول

دقيت سنين ... و الرد يرجع لي : مين ؟

لو كنت عارف مين أنا كنت أقول

عجبي !!!

[/b]

رباعيات صلاح جاهين ( 3 )

.. دي مزكرات و كتبتها من ســـــــــنين
في نوتة زرقا لون بحور الحنيــــــــــــن
عترت فيها .. رميتها في المهمـــــــلات
وقلت صحيح أما صحيح كلام مخبولين
عجبي !!

دخل الشتا وقفل البيبان ع البـــيوت
وجعل شعاع الشمس خيط عنكبوت
وحاجات كتير بتموت في ليل الشــتا
لكن حاجات أكتر بترفض تمــــــوت
عجبي !!

- الدنيا من غير الربيع مــــــــيته
ورقة شجر ضعفـــــــانه و مـــفـــــتــته
- لا يا جدع غلطان تأمل وشوف
زهر الشتا طالع فــــــــي عز الشـــــتا
عجبي !!!

ياللي انت بيتك قش مفروش بريش
تقوي عليه الريح .. يصبح ما فيش
عجبي عليك حواليك مخالب كـــــبار
و ما لكش غير منقار و قادر تعيش
عجبي !!!!

سمعت نقطة ميه جوه المحيـــــــط
بتقول لنقطه ما تنزليش في الغويط
أخاف عليكي م الغرق .. قلـــــت أنا
ده اللي يخاف م الوعد يبقي عبيط
عجبي !!

ودمتم بخير
ودي..~